Ginpanindugan sang isa ka abogado nga dapat nga may manabat gid kasunod sang ginamo sa Senado sang Myerkules sang gab-i, Mayo 13, antes nakumpirma nga nakapalagyo na si Senator Ronald “Bato” Dela Rosa.
Sa interview sang Bombo Radyo kay Atty. Rodel Taton, Dean sang Graduate School of Law sa San Sebastian College–Recoletos, Manila, iya ginpahayag nga tuman ka damo nga palamangkutanon ang nagapalibot sa amo nga hitabo.
Lakip sa ginmensyonar sini amo ang kakulangan sang closed circuit television (CCTV) footage kun sa diin tuman ka daku ang ginagasto sang gobyerno, apang sang tion nga kinahanglan na nga i-review, indi na makita bangud sang ginhungod nga patyon ang mga suga.
Matandaan nga sa Facebook Live video ni Senate President Alan Peter Cayetano sang amo nga gab-i, ginsiling sini nga ginpatay nila ang suga matapos ang lukpanay nga natabo.
Ginmuno man sang abogado ang clip kun sa diin may senador nga nag-mention nga itago ang CCTV. Base sa nagalapta nga video online, si Senator Jinggoy Estrada ang yara sa amo nga clip.
Ginkwestyon man ni Atty. Taton kun ngaa daw naga-gwa nga wala man nabatyagan sang mga senador ang kulba kasunod sang tensyon, kag may natabo pa nga simultaneous nga pag-live sang mga senador sa ila Facebook.
Matandaan nga sang amo nga gab-i, kadam-an sang mga senador nga yara sa Senate Building ang nag-update sang ila sitwasyon via Facebook Live lakip na si Senate President Cayetano, Senators Pia Cayetano, Imee Marcos, Bong Go, kag mangin ang ginabansagan nga “tahimik lang” nga si Mark Villar.
ISA KA PAGPANG-ATAKE
Sa press briefing kahapon, namwersa si Senate President Cayetano sang ginpamangkot siya kun ginakonsiderar sini nga pagpang-atake ang natabo sa Senado sang Myerkules sang gab-i bisan nga nag-ako man ini nga ang personnel sang Senate security man ang una nga nagpalupok.
“Kung tututukan kita ng baril, papasukin ko ang bahay mo na may baril ako, nag warning shot ka, pinutukan kita, pabalik, is it not an attack?” suno sa Senate leader.
“Sorry ha, but I don’t think there is any question, the Senate is under attack. Was under attack,” dugang sini matapos ginhampak ang podium.
Ini nga pahayag ang kasunod sang inisyal nga imbestigasyon sang Department of the Interior and Local Government (DILG) nga 32 ka mga lupok ang nabatian sang amo nga gab-i. 27 diri ang halin sa personnel sang Office of the Senate Sergeant-At-Arms (OSAA).
Ginapahayag nga nag-warning shot ang OSAA, nagbalos ang armado nga mga personnel rason nga may tatlo ka minutos nga balusay sang lukpanay.#
