Magatanom ang Iloilo City Government sang 100,000 seedlings para sa major tree growing activity subong nga tuig.
Ipangtanom ini sa nanuhay-tuhay nga bahin sang syudad umpisa sa bulan sang Hulyo.
Sa interview sang Bombo Radyo kay Engr. Neil Ravena, head sang General Services Office, iya ginpahayag nga isa sa mga lugar nga target tanuman amo ang bilog nga Diversion Road,Mandurriao.
Suno kay Ravena, 10,000 native trees ang ipangtanom sa amo nga area bilang kabahin sang plano nga himuon ini nga “green corridor” bilang tikang agud mahagan-hagan ang epekto sang tuman ka init nga panahon.
Ang ginaplano nga “green corridor” ang magasakop sang dalan halin sa area sang Gen. Luna Street padulong sa Ungka, Jaro nga may kalabaon nga apat ka kilometros.
Nahibaluan nga ginsuguran ang pagtanom sang kahoy sa Diversion Road sang panahon sang administrasyon ni former Mayor Jerry Treñas kun sa diin 2,000 ka native trees ang ginpangtanom.
Plano man nga tamnan sang kahoy ang mga bike lanes agud nga may handong para sa mga bikers sa bisan ano man nga oras.
Kuhaon naman sa Department of Environment and Natural Resources ang 100,000 nga mga seedlings para sa nasambit nga greening program sang syudad.
