Ginkumpirma sang acting head sang Office of the Senate Sergeant-at-Arms nga wala sang na-recover nga CCTV footage nga nagapakita sang hulag sang Senate security personnel kag Philippine Marines kadungan sang ginamo kag gunfire incident sang Myerkules sang gab-i, Mayo 13.
Ginpahayag ini ni OSAA Chief kag Retired Major General Mao Aplasca sang ginpamangkot siya natuhoy sa mga ebidensya nga posible magamit sa pormal nga imbestigasyon.
Suno kay Aplasca, ang lamang posisyon sang mga agent sang National Bureau of Investigation (NBI) kag ang punta sang “tactical personnel” sang Senado ang nadala sang ila gin-review ang footage.
Samtang, ginkumpirma man ni Aplasca subong nga adlaw nga siya ang una nga nagpalupok sang “warning shot” bilang kabahin sang ila “rules of engagement.” Suno sa iya, ginahimo ini kun yara na sa peligro ang kabuhi sang ila mga katapo agud mapilit ang pihak nga kampo nga mag-atras.
Suno pa kay Aplasca, nakita nila nga armado sang malaba nga pusil ang mga indibidwal gani nagpatuman sila sang verbal challenge. Ginsugo nila ini nga magpakilala kag ipapanaog ang ila armas, apang bangud sang agresibo nga tindog kag hulag sang pihak nga grupo, napilitan siya nga magpalupok, nga amo ang nag-trigger sang pagbayluhanay sang lupok.
Ginpahayag man ni Aplasca nga wala sila sang intensyon nga iguon ang amo nga mga tawo nga nagpakilala nga agents sang NBI.
‘ITAGO NIYO YUNG CCTV’
Gin-athag naman ni Senator Jinggoy Estrada nga wala sang iban nga kahulugan ang iya paghambal sang “itago n’yo ‘yung CCTV” kadungan sang ginamo sa sulod sang Senado.
Ginkondenar man sang senador ang mga nagabali sang iya ginhambal nga nagtuga suno sa iya sang sala nga interpretasyon sa social media.
Suno sa iya, ang ginatumod niya amo ang pag-secure sang CCTV footage nga magaserbe bilang importante nga ebidensya sa insidente.
“Masyadong binibigyang kulay nila ang pagsasalita ko. ‘ITAGO ANG CCTV, meaning, i-preserve ang CCTV, i-secure for future reference dahil ebidensya yan. Ilalabas natin ang ebidensya. Dun malalaman kung sino talaga nag-umpisa ng pagpapaputok sa loob ng Senado,” suno sa senador.
Pahayag pa sini, nauna naman nga ginmandu ni Senate President Alan Peter Cayetano nga i-secure ang footage samtang nagapamangkot naman si Sen. Loren Legarda kun nakuhaan bala sang CCTV ang natabo.
Una na nga gin-insister ni Cayetano nga “under attack” gid ang Senado sang amo nga gab-i — baliskad sa mga pahayag nga drama lang nila ini ukon scripted ang gunfire incident agud nga mapapalagyo si Senator Bato Dela Rosa nga subong kumpirmado na nga wala na gid man sa Senate Building.#
