Gin-anunsyo sang Office of the Ombudsman nga maga-isyu ini sang subpoena agud nga ma-secure ang Senate closed circuit television (CCTV) footage kasunod sang shooting incident sang Myerkules sang gab-i, Mayo 13.
Kabahin ini sang imbestigasyon nga himuon sang Ombudsman kun sa diin ilakip man pati ang National Bureau of Investigation (NBI), mga pulis nga yara sa Senate, kag mangin ang pila ka mga senador.
Suno kay Ombudsman Jesus Crispin “Boying” Remulla, nagalaum siya nga wala sang kulang sa footage.
“Sana naman ay walang nawawala na footage,” suno sa iya kasunod sang alegasyon nga may ginpangtago nga footage. “Sana naman walang coverup dito.”
Antes sini, nauna na nga ginkumpirma sang acting head sang Office of the Senate Sergeant-at-Arms nga si Retired Major General Mao Aplasca nga wala sang na-recover nga CCTV footage nga nagapakita sang hulag sang Senate security personnel kag Philippine Marines kadungan sang ginamo kag gunfire incident sang Myerkules sang gab-i.
Ginpahayag ini Aplasca sang ginpamangkot siya natuhoy sa mga ebidensya nga posible magamit sa pormal nga imbestigasyon.
Suno kay Aplasca, ang lamang posisyon sang mga agent sang NBI kag ang punta sang “tactical personnel” sang Senado ang nadala sang ila gin-review ang footage.
‘ITAGO YUNG CCTV’
Gin-athag man ni Senator Jinggoy Estrada nga wala sang iban nga kahulugan ang iya paghambal sang “itago n’yo ‘yung CCTV” kadungan sang ginamo sa sulod sang Senado.
Ginkondenar man sang senador ang mga nagabali sang iya ginhambal nga nagtuga suno sa iya sang sala nga interpretasyon sa social media.
Suno sa iya, ang ginatumod niya amo ang pag-secure sang CCTV footage nga magaserbe bilang importante nga ebidensya sa insidente.
“Masyadong binibigyang kulay nila ang pagsasalita ko. ‘ITAGO ANG CCTV, meaning, i-preserve ang CCTV, i-secure for future reference dahil ebidensya yan. Ilalabas natin ang ebidensya. Dun malalaman kung sino talaga nag-umpisa ng pagpapaputok sa loob ng Senado,” suno sa senador.
Pahayag pa sini, nauna naman nga ginmandu ni Senate President Alan Peter Cayetano nga i-secure ang footage samtang nagapamangkot naman si Sen. Loren Legarda kun nakuhaan bala sang CCTV ang natabo.
Una na nga gin-insister ni Cayetano nga “under attack” gid ang Senado sang amo nga gab-i — baliskad sa mga pahayag nga drama lang nila ini ukon scripted ang gunfire incident agud nga mapapalagyo si Senator Bato Dela Rosa nga subong kumpirmado na nga wala na gid man sa Senate Building.#
