‘Posibleng manlaban, so may chance na siya ay ibalita na siya ay nanlaban?’

Ginsulit sang National Bureau of Investigation (NBI) ang panawagan kay Senator Ronald “Bato” Dela Rosa nga mag-surrender na lang sang matawhay sa law enforcement agencies.

Ini ang sabat ni NBI Director Melvin Matibag matapos ginpamangkot siya kun posible ayhan nga mabalita man si Dela Rosa nga “nanlaban”.

Ini bangud ginakabig na nila ini subong bilang armed and dangerous.

“Those are all possibilities, but again, I appeal to Senator Bato to peacefully and voluntarily surrender,” suno kay Matibag.

Matandaan nga sang ginpatuman ang drug war sang nagligad nga administrasyon kun sa diin si Dela Rosa ang hepe sang Philippine National Police (PNP), masami nga rason sang pulis ang “nanlaban” kun ngaa nagakapatay ang mga subject.

Sang ginpasaka ang kaso ni former President Rodrigo Duterte sa trial, isa sa mga ginbasehan sang judges sa Pre-Trial Chamber 1 amo ang panaysayon sang insider witnesses nga peke kag ginhimu-himo lang ang rason nga “nanlaban” ukon self-defense nga ginbutang sang mga pulis sa documentary materials.

Una na nagpaathag ang NBI nga ginakabig si Dela Rosa nga “armed and dangerous” sa idalom sang standard protocol for fugitives. Suno kay Matibag, awtomatiko nga naga-operate ang law enforcement units sa assumption nga posible nga armado kag may dala nga peligro ang isa ka tawo nga subject sang search ukon arrest.

Importante gid suno kay Matibag ang doble nga paghalong kun magtuyo nga iserbe ang arrest warrant ilabi na bangud may background si Dela Rosa sa law enforcement kag sa mga nagligad nga mga operasyon.#