Padayon nga ginakadtuan sang mga pasahero ang Parola Wharf kahapon, Mayo 23, pakadto sa probinsya sang Guimaras bangud man sa selebrasyon sang Manggahan Festival.
Sa interview sang Bombo Radyo kay Janna Gange, isa ka checker sa Parola Wharf, iya ginpahayag nga sa iya obserbasyon, mas madamo ang mga nagkadto sa Guimaras subong nga tuig kumpara sang nagligad nga tuig.
Suno sa iya, wala untat ang pag-abot sang mga pasahero sa pantalan bangud madamo ang interesado nga magpadulong sa probinsya para mag-upod sa selebrasyon.
Dugang pa niya, isa sa ginalantaw nga rason sang pagdamo sang mga bisita amo nga mas matahom kag mas preparado ang programa sang Local Government para sa sini nga tuig.
Sa pihak nga bahin, ginpasimple man ang proseso sang pagsulod sang mga pasahero kun sa diin sa entrance, kinahanglan lamang magsulat sang pangalan sa manifesto antes makasulod.
Indi na kaangay sang una nga kinahanglan pa magbakal anay sang ticket antes makalista sang pangalan, bangud ang bayad ginahimo na lamang sa sulod sang fiber boat.
Suno sa otoridad, ginapatuman ini agud mapadasig ang pagpasakay kag malikawan ang pag-ginutok sang mga pasahero sa pantalan.
