Nakaagom sang minor nga pilas sa lawas ang pito ka mga pasahero matapos magbaliskad ang isa ka L300 van sa Barangay Dawis Sur, Zarraga, Iloilo kahapon sang udto, Mayo 25, 2026.
Sa interview sang Bombo Radyo kay Pcapt. Beverly Cataluña, hepe sang Zarraga Municipal Police Station, iya ginpahayag nga halin sa Capiz ang mga sakay sang van kag pakadto kuntani sa banwa sang Zarraga.
Suno kay Cataluña, ma–overtake kuntani ang driver sang van apang nadulaan ini sang kontrol kag nahulog sa gutter sa kilid sang dalan, rason nga nagbaliskad ini.
Gilayon naman nga nagresponde ang mga personnel sang Municipal Disaster Risk Reduction and Management Office agud buligan ang mga biktima kag madala sa ospital.
Sa karon, suno kay Cataluña nga estable naman ang kondisyon sang pito ka mga pasahero.
