Para makaboto bisan preso na? Erwin Tulfo, ginlaslasan ang proposed remote voting sa Senado

Nagsugod ang walkout sang mga senador halin sa minority bloc kagab-i, Mayo 26, matapos nga ginbilin ni Senator Erwin Tulfo ang isa ka prangka nga pamangkot kun ano ang tuyo sang majority bloc nga ginadalian nila nga istoryahan ang proposal ni Senator Rodante Marcoleta.

Ang ginduso ni Marcoleta amo nga amyendaran ang pagsulundan sang upper chamber agud nga tugutan ang mga senador nga magboto ukon magpartisipar sa ila sesyon sa online lamang ukon paagi sa electronic platforms.

Ginpamangkot ni Tulfo kun nagadali bala ang majority nga botohan na ini ilabi na bangud may balita nga may duha sa ila kaupdanan nga posible magatupa sa presuhan.

“Bakit tila nagmamadali na payagan ang pagboto through teleconferencing ng mga Senador? May force majeure ba? May national emergency? Yan ang tanong ng minorya. Yan ang tanong ng taumbayan. Di po tayo papayag na basta-basta na lamang ganituhin ang Senado,” pahayag ni Tulfo.

“My question is, why are we in such a hurry? Why are they, the majority, in a hurry to tackle this motion and divide the House, Madam President?” suno pa kay Tulfo nga naga-address sa presiding officer nga si Sen. Loren Legarda.

“Or is it because they are in a hurry because of news reports that probably two of our colleagues might land in jail this weekend? Is that the reason why?” dugang sini.

Wala ini sang may ginmensyonar nga pangalan apang sanday Senator Jinggoy Estrada kag Senator Joel Villanueva ang ginlawag sang Ombudsman nga posible kasuhan sang plunder sa Sandiganbayan.

Mabatian ang gahod samtang ginahambal ini ni Tulfo samtang nagtindog naman si Estrada kag nagkadto malapit sa lamesa ni Senator Bong Go. Sang ulihi, nakit-an man nga nagpalapit si Padilla kag gin-comfort si Estrada paagi sa paghapulas sa iya nga likod.

Nagsabat pa si Senate President Alan Peter Cayetano apang kadungan sini, nagalibot naman si Senator Migz Zubiri sa mga kaupod sini sa minorya kag nagasiling nga maggwa na sila kag indi na magpartisipar sa debate.

Nakaguwa na sang amo nga tion sanday Sens. Bam Aquino, Kiko Pangilinan, Risa Hontiveros, Sherwin Gatchalian, Panfilo Lacson, JV Ejercito kag Erwin Tulfo. Wala na sa session hall sanday Senator Raffy Tulfo kag Senator Lito Lapid sang natabo ang walkout.

Nagpabilin naman sa plenaryo si Minority Leader Tito Sotto apang ini agud i-move nga i-adjourn ang sesyon bangud wala na sang quorum.

May pila pa ka bagay nga gin-insister si Senator Rodante Marcoleta kag Cayetano, apang sang ulihi, dalayon na nga gin-adjourn ni Senate President Pro Tempore Loren Legarda ang sesyon. Magabalik ang sesyon sa masunod nga Lunes sang hapon.#