Ginakabig nga ang masobra anum na katuig sang cumulative service sa pagka-hepe si Police Major Bryan Alamo ang rason nga gin-relieve ini sa pwesto bilang hepe sang Pavia Municipal Police Station.
Madumduman nga pila pa lang ka adlaw pa lang sang gindestino kag nagpungko bilang hepe si PMaj Alamo sa banwa sang Pavia.
Sa interview sang Bombo Radyo kay Police Lieutenant Colonel Arnel Solis, spokesperson sang Iloilo Police Provincial Office (IPPO), iya ginpahayag sunod sa layi sang Philippine National Police (PNP) nga hatagan na sang iban nga duty kag responsibility, amo man ang pagsaylo sa iban nga posisyon ang isa ka pulis kun masobra na ini sa anum katuig nga nagapungko bilang station commander.
Suno pa kay PLt. Col Solis, bangud nga Officer In Charge pa lang man si PMaj Alamo sa Pavia MPS rason nga pwede ini mahimo sayluhon depende kun sa diin ini mas kinahanglanon.
Pahayag niya, epektibo kahapon nga adlaw, Mayo 27, 2026 ang pag-relieve kay PMaj. Alamo kun sa diin ginsaylo ini sa Iloilo Police Provincial Office.
Sa subong, nagpungko bilang OIC sang Pavia Municipal Police Station si Police Lieutenant Garry Tayongtong nga amo man Deputy Chief sang istayon.
Ginpahayag pa ni PLtCol. Solis, wala pa sang iban nga movement ukon reshuffling ang matabo sa iban nga mga chief of police sa nagkalain-lain nga MPS sa probinsya sang Iloilo.
Ginpasiguro sang IPPO nga indi maapektuhan ang serbisyo sang mga kapulisan kag pagpasiguro sang seguridad sang publiko sa banwa sang Pavia kasunod sang pag-ilis-ilis sang chief of police.
Dugang pa sini nga ‘normal’ lamang ang pagsaylo-saylo sang mga opisyales sang kapulisan rason nga wala dapat sang kabalak-an ang mga pumuluyo bangud ginapasiguro sang IPPO nga mamintinar ang kalinong kag katawhay sa bug-os nga probinsya sang Iloilo.
