Magapatigayon ang National Grid Corporation of the Philippines (NGCP) sang 12 ka oras nga scheduled power interruption sa tatlo ka substation ukon franchise area sang MORE Power buwas nga adlaw sang Dominggo, Mayo 31.
Sa interview sang Bombo Radyo kay Angel Tan, spokesperson sang MORE Electric and Power Corporation, iya ginpahayag nga kabahin ini sang ila maintenance works kun sa diin kinahanglan nga i-shutdown ang isa ka 100 MVA power transformer.
Bangud sini, isa na lamang ka temporaryo nga power transformer ang maga-serbe kag maga-operate para sa bug-os nga Iloilo City samtang ginapatigayon ang maintenance activities.
Tungod sa limitado nga kapasidad sang temporaryo nga transformer, ginalauman ang posible nga manual load dropping sa pila ka bahin sang syudad agud mapabilin nga mabaskog ang distribusyon sang kuryente.
Samtang ginapatigayon ang maintenance sang NGCP, magahimo man ang MORE Power sang mga clearing operations sa pila ka linya sang kuryente.
Ang ini nga tikang ginapatigayon agud malikawan ang mga unscheduled power interruption sa masunod nga mga bulan.
Yari ang mga apektado sang 12-oras nga power interruption, halin alas-6 sang aga tubtob alas-6 sang gab-i buwas nga adlaw sang Domingo.
Ini amo ang bahin sang Jaro Feeder 2 kag Mobile Feeder 2, lakip ang mga barangay sang Balantang, Buhang, Camalig, MV Hechanova, Our Lady of Fatima kag Our Lady of Lourdes sa distrito sang Jaro.
May yara man sang 4-oras nga power interruption, halin alas-6 tubtob alas-8 sang aga kag alas-4 sang hapon tubtob alas-6 sang gab-i, nga maga-apekto sa bug-os nga Mandurriao Feeder 4, Mobile Feeders 2 kag 3, Jaro Feeder 1, kag La Paz Feeder 5, samtang may mga bahin man sang Megaworld Feeder 4 kag La Paz Feeder 7 nga maapektuhan.
Lakip sa mga barangay nga apektado amo ang Bantud, Burgos-Mabini, Jereos, Laguda, Magdalo, Railway kag San Nicolas sa La Paz, kag Sambag amo man sang San Isidro sa Jaro.
Samtang ang 2-oras nga interruption halin alas-6 tubtob alas-8 sang aga maga-apekto sa bug-os nga Megaworld sa Feeders 2, 3, 5 kag 6, kag mga bahin sang Megaworld Feeder 4 kag Jaro Feeder 2.
Nalakip diri ang mga barangay sang Tacas kag Ungka sa Jaro, pati mga bahin sang Dungon B, MV Hechanova, Quintin Salas kag Tabuc Suba nga mapektuhan sang power interruption.
Maapektuhan man ang mga barangay sang Ungka I, Ungka II kag Mali-ao sa banwa sang Pavia.
Ginpasiguro sang MORE Power nga bukas ang ila customer hotline para sa mga concern kag rekurida may kaangtanan sa power interruption.
May yara man sang ginpreparar nga charging stations para sa mga konsumidor nga mangin apektado sang pagkadula sang kuryente.
Nagabantay naman ang MORE POER sa sitwasyon may kaangtanan sa posible nga manual load dropping sang NGCP kag padayon nga naga-coordinate sa ila mga customer agud mahatagan sang nagakaigo nga impormasyon kag updates.
Ginpahayag man sang MORE Power nga ila pagatinguhaon nga mabalik gilayon ang supply sang kuryente pagkatapos sang maintenance works.
