Nabulsa sang Ilonggo players nga nagatiglawas sang Western Visayas ang kampyonato sa Football Elementary Boys sa Palarong Pambansa 2026.
Ginlampaso sang team halin sa Iloilo ang Central Visayas, 5-0, sa gold medal match nga ginpatigayon kahapon sang hapon sa Patin-ay, Prosperidad, Agusan Del Sur.
Gintiglawas sang Barotac Nuevo Central Elementary School ang Rehiyon 6 kag may pick-up players halin sa banwa sang San Dionisio, Sta. Barbara kag Guimbal.
Natapos sang team ang ila misyon nga makuha liwat ang korona matapos nga nangin silver medalist sa 2025 Palarong Pambansa.
Sa interview sang Bombo Radyo kay Coach Sam Pastera Flores kag Coach Ariel Bedic, ila ginpahayag nga nagbunga gid sang maayo ang ila tanan nga kabudlayan kag training matapos ang ila anom ka bulan nga pag-updanay agud preparahan ang kompetisyon.
Suno kay Coach Flores, indi malikawan ang madamo nga pagpanghangkat sa ila preparasyon, apang bilang coach, gintinguhaan gid nila nga malampuwasan ang tanan nga mga kabudlayan.
Gindugang pa sang coach nga masami gid nila ginalaygayan ang mga kabataan nga importante ang disiplina sa ila tagsa ka kaugalingon kag paghatag sang nagakaigo nga oras sang pahuway agud nga mangin maayo pa ang ila nga performance.
Nagpasalamat man si Coach Flores kag ang bug-os nga team sa tanan nga mga tawo nga naghatag sang suporta kag pagsalig sa ila agud makuha ang kadalag-an para sa rehiyon.
Antes nakaabot sa championship round, ginlutos sang Ilonggo players sa semifinal match ang defending champion nga Davao Region, 1-0.
