Nangin madinalag-on sa patag sang pagtudlo ang isa ka tumandok sang Barangay Panuran, Janiuay, Iloilo matapos ginpasidunggan bilang Outstanding Ilonggo Teacher sa Estados Unidos.
Ini amo si Dr. Marjon M. Roche nga 17 na ka tuig nga nagatudlo kag nagahatag inspirasyon sa mga estudyante nga iya nakilala sa iya propesyon.
Sa interview sang Bombo Radyo kay Roche, iya ginpahayag nga indi nangin madali para sa iya nga mauyatan gilayon ang ginahandom sini sa kabuhi, apang naghimakas gid ini agud maluwas sa kapigaduhon ang iya kaugalingon, amo man ang iya pamilya.
Sa dose ka mag-ululutod, nagtinguha si Dr. Roche sa pag-tuon sini tubtob nga nagraduwar ini nga cum laude sa kolehiyo kun sa diin nagbulig sa iya sa pagsugod sang mas maayo agud makapangita sang obra gilayon kag makabulig man sa iya pamilya.
Indi lamang sa Pilipinas sini gin-practice ang iya pagtudlo kundi pa ti man sa mga pungsod kaangay sang Indonesia, Thailand, kag Estados Unidos kun sa diin napalapnag sini ang iya kaalam, kapisan kag passion sa pag-inspire man sa mga estudyante paagi sa iya pagtudlo.
Sa subong, nagaserbe ini bilang Elementary and Middle School Science Teacher kag 6th Grade Homeroom Adviser sa Harmony Science Academy–Odessa sa Texas sa idalom sang Harmony Public Schools.
Suno pa kay Roche, ang tagsa ka oportunidad nga naga-abot sa iya ginahimo gid sini nga inspirasyon agud magtinguha pa gid kag ihatag ang iya pinakamaayo nga performance sa iya trabaho.
Nagbilin man ini sang mensahe sa mga estudyante nga dapat nila nga tagaan sang importansya ang edukasyon kag gamiton ang tagsa ka oportunidad nga naga-abot sa ila agud magbag-o ang dalagan sang ila tagsa ka kabuhi.
Para kay Dr. Roche wala gid sang impossible sa tawo nga nagahimakas lamang kag ginahatag ang ila best agud malab-ot ang ila handom sa kabuhi.
