Nagpahanumdom si Rev. Fr. Reeve Michael Sogoan sa mga tumuluo nahanungod sa matuod nga kahulugan sang relasyon, paghiusa, kag gugma nga yara sa sentro sang pagtuo bilang isa ka Kristiyano.
Ini kadungan man sang pagsaulog subong nga adlaw sang Domingo, Mayo 31, sang Solemnity of the Most Holy Trinity.
Sa homily ni Father Sogoan, ginpahayag sini nga tuman ka importante ang maayo nga pagtamdanay sa biskan ano pa nga klase sang relasyon.
Pahayag pa sini nga ang balaan nga trinidad isa ka Dios sa tatlo ka Persona, ang Amay, Anak, kag Espiritu Santo nga ginakonsiderar bilang isa sa pinakamataas nga ehemplo sang paghiusa kag komunyon.
Dugang pa ni Father Sogoan nga ang tawo wala nagauswag kon naga-isahanon lamang ini gani importante ang pagbinuligay.
Suno pa sa iya nga ang tagsa ka sakripisyo kag buhat nga wala naga-isip, nagapakita sang gugma sang Dios sa kalibutan.
Ginpahanumdom man niya ang mga tumuluo kag ang Simbahan isa ka komunyon sang katawhan sang Dios kag dapat likawan ang mga butang kaangay sang hisaay kag pag-inaway nga nagaguba sang relasyon sa sulod sang pamilya, komunidad, kag Simbahan.
Nagapang-agda man si Fr. Sogoan sa tanan nga mangin matutom sa ila pang-adlaw-adlaw nga komitment sa paghigugma, pagserbisyo, kag paghiusa bilang pamatuod sang ila pagtuo kag pagsunod sa ehemplo sang holy trinity.
