Hugot sa tagipusuon nga ginbaton sang Western Visayas ang resulta sang 2026 Palarong Pambansa apisar nga nataktak ini overall ranking sa opisyal na nga pagtakop sang mga hinampang sa Agusan del Sur.
Nagapangatlo ang Western Visayas tubtub sang Sabado, apang sa ulihi nga sports events, nalapawan ini sang Davao Region kag sang Central Visayas.
Nagpauli ang Rehiyon VI nga may 31 gold, 36 silver, kag 45 bronze medals kag amo ang overall fifth placer sa sini nga edisyon sang Palaro.
Nabulsa naman sang Davao ang 34 gold, samtang may 32 gold medals ang Central Visayas. Kampyon naman sa ika-19 na nga sunod-sunod nga tuig ang National Capital Region nga may 91 ka bulawan nga medalya.
Matandaan nga nagpangaduha sa overall ranking ang Western Visayas sang 2023 kag nagpangatlo naman sang 2024 kag 2025.
Sa interview sang Bombo Radyo kay Mr. Hernani Escullar Jr., spokesperson sang DepEd Region 6, iya ginpahayag nga daku sa gihapon ang ila pagpasalamat sa kontribusyon sang tagsa ka atleta, coach kag mga delegado nga nagrepresentar sa Western Visayas sa kompetisyon.
Suno kay Escullar, madamo sang mga kabudlayan ang ila naagyan antes ang Palaro, apang wala gid nagkulang ang dedikasyon kag pagpaninguha sang ila mga atleta kag ginhatag gid nila ang ila pinakamaayo nga performance.
Apisar wala nakasulod sa top three ang rehiyon, madamo sa gihapon sang positibo nga natabo lakip na diri ang pagdamo sang mga atleta nga nakakuha sang bag-o nga rekord sa nagkalain-lain nga hampang.
Lakip sa record-holders amo ang elementary girls sang Western Visayas nga overall champion sa patag sang athletics.
Nanguna sa pagdala sang banner sang Western Visayas sa amo nga division ang “Flash Girls” sang Quinto Distrito sa Iloilo nga ginabug-usan nanday Trixia Anne Arellano halin sa Concepcion, kag Maria Athena de Guiño, Norlyn Bedo, kag Princesa Lyn Yanson halin sa banwa sang Carles.
Sila ang nagkampyon sa 4x400m relay. Nangibabaw man sila sa 4x100m relay kun sa diin nakalab-ot pa sa 51.79 seconds nga amo ang nag-guba sang 52.44 seconds nga record sa Palarong Pambansa nga napagkit sadtong 2015.
Magluwas diri, si Arellano ang nagdaog man sang gold medals sa 100-meter dash kag 200-meter dash. Tumandok si Arellano sang Barangay Lo-ong, Concepcion, produkto sang Concepcion Central School, ginabansagan nga “Super Tikya”, kag bantog nga nagadalagan nga nagatiniil lang.
Nahibaluan nga ini ang una nga Palaro edition nga indi na kaupod sang Western Visayas ang Negros Occidental matapos nga natukod na ang Negros Island Region. Nagapang-11 sa overall medal tally ang NIR nga may 16 gold, 24 bronze, kag 29 bronze medals.#
