Nasalakay na naman sang isa ka 10-wheeler truck ang vertical clearance sa Buhang Flyover subong nga gab-i, Hunyo 6.
Kargado sang steel bar kag iban pa nga construction materials ang amo nga truck nga halin pa sa Cebu kag pakadto kuntani sa Antique.
Ang driver amo si Noli Miraya, 43, residente sang Leyte kag pito ka tuig naman nga pabalik-balik ang byahe sa Iloilo. Kaupod sini ang pahinante nga si alias Dave, 34-anyos.
Sa interview sang Bombo Radyo sa driver, iya ginpahayag nga sa kalawigon sang iya byahe, ini pa lang ang una nga bes nga natabo ini sa iya kag wala man gani ini nakahibalo nga may yara gali sang vertical clearance.
Pasado alas singko sa hapon sang naghalin ang truck sa Dumangas port kag sang naglabay sila sa flyover sang manug-alas syete na sa gab-i, wala sini namutikan nga may yara sang pahibalo bangud nga sa dalan man ini nagatulok.
Pahayag sang driver, tuman ka silaw ang suga sang ila nasugata nga salakyan.
Bangud sa natabo, nakakas ang ginaangtan kag nagtungtong sa truck ang vertical clearance.
Wala man sang may nasamaran sa insidente apang nagalalain man ang driver bangud sa inisyal nga nahambalan sa ila nga balayran magluwas pa nga naguba ang ibabaw nga porsyon sang ila truck.
Sa bahin naman sang kapulisan, ginpahayag nga responsibilidad sang operator ukon tag-iya sang truck ang pagpakayo sang naguba nga vertical clearance sa flyover.
Nahibaluan nga antes sini nga insidente, makapila ka beses na nga nasalakay ang amo nga vertical clearance sa approach sang flyover halin sang ginbuksan ang amo nga project sang Abril 30.
Istrikto nga ginadumilian nga makalabay sa amo nga flyover ang dump trucks, transit mixers, wing vans, trailer trucks, motorcycles, tricycles, bicycles, kag e-bikes, kag may nakabutang man nga speed limit nga 40 kilometers per hour.#
