Naghatag sang mga importante nga tips ang isa ka innovator and consultant para sa mga estudyante nga magasugod naman sang ila klase sa sini nga bulan sang Hunyo.
Sa interview sang Bombo Radyo kay Ken Lerona, founder sang Cornelius Magnate, iya ginpahayag nga madamo sang mga butang nga dapat lauman kag handaan sang mga estudyante sa sini nga bag-o nga school year.
Suno kay Lerona, kinahanglan nga preparado ang mga estudyante indi lamang sa aspeto sang pagtuon kundi pati man sa ila pinansyal, emosyonal, kag psychological nga kondisyon.
Dugang pa sini nga importante ang pagpreparar sang kaugalingon sa pisikal nga aspeto agud malikawan ang mga balatian kag mapabilin nga maayo ang kahimtangan sang ikaayong lawas sa bug-os nga school year.
Pahayag pa niya, dapat magpabilin nga positibo ang mga estudyante sa ila relasyon sa ila mga kaabyanan kag classmates, kag tan-awon ang eskwelahan bilang isa ka importante nga milestone sa ila kabuhi.
Dugang pa ni Lerona nga dapat i-appreciate sang mga kabataan ang ila kaugalingon kag kabigon nga ang edukasyon isa ka maayo nga benepisyo kag oportunidad para mapasangkad ang ila kaugalingon.
Ginlaragway man niya nga ang edukasyon isa ka yabi nga magabukas sang madamo nga oportunidad kag magabulig sa mga kabataan agud mangin masanag ang ila nga mga buwas-damlag.
