Nagpahanumdom si Father Aris James Java, parish priest sa Jaro Metropolitan Cathedral nga tuman ka importante ang pagbaton sang
lawas kag dugo ni Kristo paagi sa pagpangalawat kadungan man sang Solemnity of the Most Holy Body and Blood of Christ subong nga adlaw sang Domingo, Hunyo 7.
Sa homily ni Father Java, iya ginpahayag nga makabulig gid sa tawo ang pagbinag-binag sang iya mga binuhatan kag sang iya pa nga pagabuhaton kun nahibaluan sini kun paano ini umpisahan sang insakto.
Suno pa sa iya nga kaangay sang pagbaton sang tinapay nga ginhurma sang kaayuhan sang langit, dapat mahibaluan man sang tawo kun paano ang pagbaton sang mga kasakit nga ma-eksperyensyahan sa kalibutan.
Pahayag pa sini nga katulad sang tinapay nga ginapihak-pihak kinahanglan hakson sang tawo ang mga inadlaw nga kun kaisa indi kumpleto sang iya kagustuhan apang nagapadayon sa paghatag sang paglaom sa iya kaugalingon.
Apisar ginahangkat sang mga pagtilaw sa sini nga kabuhi, nagpahanumdom man si Father Java nga wala sang makapugong sa isa ka tawo nga tumanon ang iya misyon bilang kristyano bangud nagalaom ini sa Diyos.
Nagapang-agda man si Father Java nga padayon nga magpalangga, maglaom kag mangin mapinasalamaton sa tanan nga bugay nga ginahatag sang Diyos sa sini nga kabuhi.
