Nagpangayo sang pasaylo si anay Mister Supranational Philippines 2024 Brandon Espiritu matapos makabaton sang madamo nga pagpakamalaot bangud sa iya pahayag nahanungod sa mga beauty pageant contestant nga may samo nga iban nga nationalities ukon iya gintawag nga “halfies.”
Nagsugod ang kontrobersiya sa isa ka viral nga komento sini sa Instagram sa tunga ni Espiritu kag ni Filipino-American model kag pageant titleholder nga si Jether Palomo.
Sa iya comment, nagsiling si Espiritu nga mabudlayan ang Pilipinas nga magpakigkompetensya sa mga pageant kon wala ang mga Pilipino sang half nga nationality .
Madamo nga netizens ang nagpakamalaot sa iya pahayag kag nagsiling nga ginapanubo sini ang abilidad sang mga Pilipino nga puro Pilipino ang dugo nga magdaog sa mga international pageant.
Lakip sa nagpahayag sang ila pagkadismaya sanday Miss Universe Philippines 2024 first runner-up Stacey Gabriel kag kilala nga Filipino fashion designer nga si Michael Cinco.
Sa iya pahayag, gin-athag ni Espiritu nga wala siya sang katuyuan nga panubuon ang mga kadalag-an sang mga Pilipino nga nagarepresentar sang pungsod.
Ginpahayag man sini nga bug-os ang iya pagpabugal sang iya pagka-Pilipino kag nangayo siya sang pasaylo sa mga nasakitan sang iya mga ginpanghambal.
Nagpasalamat man ini sa mga tawo nga naka-intindi kag suno pa kay Espiritu nga mangin importante ini nga leksyon agud mas maintindihan sini ang epekto sang iya mga pahayag sa publiko.
