Presuhan ang gintup-an sang isa ka police office matapos gin-alegar nga gintuyo sini nga himuslan ang isa ka room attendant sa Iloilo City.
Ang suspek amo ang 29- anyos nga patrolman nga assigned sa Regional Mobile Force Batallion.
Ang biktima amo ang 26-anyos nga helper sang pension house kun sa diin nag-check-in ang suspek.
Sa interview sang Bombo Radyo kay PMaj Eduardo Siacon Jr., hepe sang Iloilo City Police Station 9, iya ginpahayag nga base sa imbestigasyon, una nga nag-check in ang suspek sa isa ka room apang nag-request ini nga magsaylo bangud indi mabaskog ang wifi connection.
Suno kay Siacon, samtang ginatinluan sang biktima ang kwarto kun sa diin nagsaylo ang pulis, didto na natabo ang tuyo nga paghimulos.
Base sa panaysayon sang biktima, gin-lock sang suspek ang pwertahan kag gintuyo himuslan ang biktima nga tuman ang kahadlok matapos nakita nga may dala nga pusil ang suspek.
Apang, nakapangita sang paagi nga makagwa ang biktima matapos ginsiling niya nga may asikasuhon lamang siya kag magabalik man ini kag nagpasugot man ang pulis.
Didto na nakapangayo sang bulig ang biktima nga nag-resulta sa pagkaaresto sa nasambit nga police officer.
Subong nga adlaw, ginalauman nga mapasaka ang reklamo nga attempted rape batok sa suspek.
