Nagpatigayon subong nga adlaw, Hunyo 11 ang Iloilo City Government sang random drug testing sa mga empleyado sang Iloilo City Hall.
Sa interview sang Bombo Radyo kay Joy Fantilaga Gorzal, Spokesperson ni Mayor Raisa Treñas, iya ginpahayag nga ini nga inisyatibo ginapatigayon agud mangin malimpyo ang proseso sang pagserbisyo sang mga opisyales sang City hall sa publiko.
Ang nasambit nga random drug testing ginalakipan sang mga contract of service, job hire, kag regular employees.
Suno pa kay Gorzal, ini kabahin man sang padayon nga implementasyon sang Executive Order No. 2026-037 nga ginpapanaug ni Mayor Raisa S. Treñas para sa Drug-Free Workplace Policy sang Iloilo City Government.
Pahayag pa sini nga ini nga random drug testing isa ka importante nga tikang agud masiguro nga ang mga empleyado nagaserbisyo sa publiko nga may ara sang integridad, propesyonalismo, kag responsibilidad.
Padayon ang Iloilo City Government sa pagpasangkad sang mga programa kag polisiya nga naga-una sa kaayuhan sang mga empleyado kag sa paghatag sang efficient kag masaligan nga serbisyo publiko.
Ini nga tikang nagapakita man sang mabakod nga panindugan para sa matinlo kag matuod nga pagdumala para sa tanan nga Pamilyang Ilonggo.
Nahibaluan nga ini na ang ikatatlo nga pagpatigayon sang random drug testing sa nagkalain-lain nga departmento sang City hall.
