Nakagwa na sa presohan ang isa ka police officer nga gina-alegar nanghimulos sa isa ka room attendant sang pension house sa Brgy. Villa Anita, City Proper sang Mierkules, Hunyo 10.
Sa interview sa Bombo Radyo kay ICPO Director PCol Wilbert Parilla, iya ginpahayag nga nakagwa ang pulis sa presohan matapos nga nakapyansa ini kahapon sang hapon, Hunyo 11.
Madumduman nga ang suspetsado ang ginkilala kay alyas Lee, 29-anyos, residente sang Purok 4, Nangka Balo-i, Lanao del Norte kag naka-assign sa 602nd Company sang Regional Mobile Force Battalion (RMFB) kag may ranggo nga Patrolman.
Suno kay PCol Parilla, na-file naman ang kaso nga Attempted Rape batuk sa pulis.
Pahayag pa niya, ang mother unit sang pulis nga amo ang RMFB ang magapatigayon sang imbestigasyon angut sa administrative case nga pangatubangon sang suspetsado.
Ginpahayag man niya nga posible makakas sa serbisyo ang pulis kun mapamatud-an ang alegasyon batuk sa iya.
Ginapasiguro man ni PCol Parilla nga patas ang mangin imbestigasyon sang kapulisan sa nasambit nga hitabo kag hugot niya ginpahayag nga wala gin-tolerar ang malain nga binuhatan sang mga pulis.
Sa subong, padayon pa ang imbestigasyon sang Iloilo City Police Station (ICPO) angut sa nasambit nga alegasyon agud mahibaluan ang tuod nga natabo.
