Ginpabaskog pa sang Department of Labor and Employment (DOLE) Region 6 ang kampanya sini para sa disente nga obra bilang isa sa importante nga bahin sang kahilwayan.
Kaangot sini, gina-engganyo sang pamunuan nga linibo ka mga job seekers sa “Trabaho Agad Job Fair” ang maga-tambong kadungan man sang ika-128 nga Indepedence Day subong nga adlaw.
Suno kay Sixto Rodriguez Jr., Regional Director sang DOLE-6, may masobra sa 5,000 ka bakante nga posisyon nga available para sa mga job seeker.
Sa sini nga numero, labaw sa 3,400 ka trabaho ang para sa local employment, samtang kapin sa 1,600 naman ka oportunidad ang para sa gusto nga magtrabaho sa luwas sang pungsod.
Lakip sa mga nagapanguna nga bakante nga posisyon amo ang customer service representatives, loan officers, production crew, officer candidate soldier course trainees, premium agents, sales associates, service crew, janitors/janitresses, English as a Second Language (ESL) tutors, kag financial consultants.
Lakip man sa mga nagapanguna nga industriya nga may bakante nga trabaho amo ang agrikultura, manufacturing, construction, wholesale kag retail trade, accommodation kag food services, information kag communication, financial kag insurance activities, real estate, administrative kag support services, kag public administration kag defense.
May yara man sang one-stop shop nga pagapartisiparan sang mga partner nga ahensya sang gobyerno agud maghatag sang importante nga mga serbisyo sa mga aplikante.
Pagahiwaton ini nga job fair sa isa ka mall sa Iloilo City sugod alas-9:00 sang aga.
