Napuhag ang mga pumuluyo sang Brgy. Fundacion, Dueñas, Iloilo matapos may ma-gwa nga kalayo sa ila ginatasukan.
Sa interview sang Bombo Radyo kay Joebert Barranco, isa ka residente sa lugar, iya ginpahayag nga ma-iwat ang tuburan sa ila nga lugar rason nga nagapangita gid sila sang lugar agud makatasok.
Suno kay Barranco, direkta nila nga gintibsok ang tubo sa ila ginakutkutan sa duta apang sang naglab-ot na sa kapin 150 feet ang ila pagkutkot, nakapanimaho sila sang sungaw nga kaangay sang gas sang lighter.
Bangud nga nagapanimaho sang sungaw kaangay sang lighter, ila naman gin-testingan sindi ang ila gintasukan kag gilayon nga nag-ibwal ang kalayo paibabaw.
Suno sa mga residente, ang kataason sang kalayo nga nagguwa kaangay sang kataason sang isa ka poste.
Ginpahayag man ni Barranco nga bisan ano nila ka basya sang tubig ang kalayo, wala ini nagakapatay.
Nahibaluan nga indi ini ang una nga insidente nga natabo sa Duenas, Iloilo bangud sang tuig 2014, ginkatingalahan man sang mga pumuluyo sang Brgy. Tinocuan, Dueñas ang kalayo nga nag-igrab kon sindihan ang sungaw nga nagaguwa sa tasok sang tubig sa amo nga lugar.
Suno naman sa Environmental Management Bureau ukon EMB-6, posible nga ang amo nga hitabo bangud may ara sang presensya sang methane gas ukon natural gas nga natrap sa idalom sang duta.
Mahimo man nga mag-igrab kon masindihan ang methane nga isa ka klase sang hydrocarbon.
Sa subong, ila na nga na-report ang insidente sa Department of Environment and Natural Resources (DENR) agud maimbestigaran kag mahibaluan ang ginahalinan sang nagaguwa nga gas kag tubig sa lugar.
