Patay ang duha ka tawo kag duha man ang pilason matapos nagbungguanay ang isa ka pick-up, tricycle, kag motorsiklo sa Sitio Cubay, Barangay Poblacion, Bingawan, Iloilo kahapon nga adlaw, Hunyo 13.
Sakay sa tricycle sanday Felix, 64 anyos, kag iya asawa nga si Besie, 65 anyos, samtang, ginamaneho naman ni Alyas Joyjoy ang motorsiklo kag angkas sini si Daven, 20 anyos ang edad.
Sa interview sang Bombo Radyo kay Police Lieutenant Philip Girao, Officer-in-charge sang Bingawan Municipal Police Station, iya ginpahayag nga nagapadulong sa isa ka direksyon ang tricycle kag motorsiklo, samtang ang sa pihak naman nga linya, may nagapadulong naman nga Isuzu pick-up pakadto sa Calinog.
Pag-abot sa liko-on nga bahin sang dalan, naglapaw sa iya linya ang pick-up kag nagbunggo ini sa tricycle kag motorsiklo.
Bangud sang mabaskog nga impact, natabog si Joyjoy gikan sa iya motorsiklo kag nasalakay pa ini sang pick-up.
Gindala naman ini sa ospital apang gindeklarar nga dead-on-arrival.
Sa pihak nga bahin, nagapaayo na kuntani sa ospital si Felix nga driver sang tricycle sang ginbawian man ini sang kabuhi bangud sang dako nga pilas nga iya naangkon.
Padayon naman nga ginabulong sa ospital si Besie, samtang nakaguwa na si Daven matapos makaangkon sang pilas kag bagras sa lawas.
Paagi sa hot pursuit operation sang Bingawan MPS, naaresto ang driver sang pick-up nga boluntaryo man nga nagsurrender sa Punong Barangay sang Barangay Quinar-upan, Bingawan, Iloilo.
Nagahanda na ang kapulisan sang kaso nga Reckless Imprudence Resulting in Homicide, Physical Injuries, kag Damage to Property batok sa suspek.
Padayon naman ang imbestigasyon sang kapulisan agud matumod ang kabug-usan nga natabo sa amo nga aksidente.
