Magapabilin nga normal ang serbisyo kag operasyon sang Iloilo City Hall subong nga adlaw, Hunyo 15, apisar sang gin-report nga bomb threat.
Suno kay Vice Mayor kag Acting Mayor Love Baronda, manduan sini ang Building Administrator kag ang Head of Security nga mas pabaskugon ang security measures para sa safety sang mga empleyado, kliyente, bisita, kag publiko.
“I have coordinated with the police and am awaiting their official report to obtain the complete details of the reported bomb threat and the actions taken by the authorities,” suno sa official statement ni Baronda.
“In the meantime, services and operations at Iloilo City Hall will resume as normal tomorrow. I will direct the Building Administrator and the Head of Security to strengthen and strictly enforce security measures to ensure the safety and well-being of our employees, clients, visitors, and the general public,” dugang sini.
Ginpanawagan man sini sa tanan nga magpabilin nga aligmat.
“I thank everyone for their understanding and cooperation, and encourage all concerned to remain vigilant as we continue to prioritize the safety and security of everyone who works at and transacts business with Iloilo City Hall,” kabahin pa sang iya post kagab-i.
Si Baronda ang acting mayor subong bangud yara sa Singapore si Mayor Raisa Treñas para magtambong sa Mayors Forum kadungan sang 10th World Cities Summit.
Sa separado naman nga statement sang alkalde, gindayaw sini ang Iloilo City Police Office (ICPO), City Explosives and Canine Unit, kag tanan nga concerned agencies sa madasig nga pag-responde agud nga mabantayan ang seguridad sang publiko. Ginpasalig sang alkalde nga bisan yara siya sa luwas sang pungsod, magapadayon siya sa pag-monitor sa mga nagakatabo sa syudad.
Nahibaluan nga sa mensahe sang nagpadala sang threat, nagpaandam ini nga may lima siya ka bomba nga itanum sa Iloilo City Hall kag sa Iloilo Provincial Capitol subong nga adlaw.
Pagkatapos na-report sa pulis ang amo nga mensahe, gilayon nga gin-deploy ang mga personnel sang Philippine National Police Regional Explosive Ordnance Disposal and Canine Unit (RECU) VI.
Gindeklarar man nga cleared sa bomba ang City Hall kag ang Provincial Capitol, apang suno sa pulis, pataason ang security bwas kag may i-detail nga dugang nga mga personnel.#
