Nagapabilin sa gihapon nga at-large ang isa sa mag-utod nga suspek sa pagtiro-patay sa biktima nga nasapwan nagautaw-utaw sa floodway nga sakop sang Brgy. Balabago, Jaro sang Hunyo 11.
Suno kay Police Captain Mavin Laraño, hepe sang Iloilo City Police Station 3, nga ang suspek nga si Alias Jimmy, 39 anyos ang nakapalagyo kag wala pa nadakpan tubtob subong.
Samtang ang magulang sini nga si Alias Jommel, 44 anyos ang naaresto na sang kapulisan.
Madumduman nga ang biktima ang ginkilala kay Shane Caso, 34-anyos, residente sang Negros Occidental nga temporaryo nagapuyo sa nasambit nga barangay.
Suno kay PCapt Laraño, napasaka na ang kaso nga Murder batuk sa duha ka suspek.
Pahayag pa niya, daan nga huligut-anon ukon away sa lupa kag amo man ang impluwensya sang makahulubog nga ilimnon ang nangin rason sang krimen.
Ginpahayag man sini nga duha na ka tuig ang away sang suspek kag biktma bangud sa lupa kun sa diin nagpatindog ang biktima kag suspek kun sa diin lunsay lamang ang mga ini mga informal settlers sa lugar.
Ginkumpirmar man ni PCapt. Laraño nga naga-engage sa gihapon sa iligal nga droga ang mga suspek ilabi na si alyas Jimmy kag subject ini sa drug buybust operation sang mga otoridad.
Dugang pa niya, tubtob subong wala sa gihapon narekober sang kapulisan ang armas luthang nga gingamit sang mga suspek sa krimen kag wala sa gihapon nahibaluan kun sin-o sa duha ka suspek ang nagtiro sa biktima.
Kumpirmado man nga ginbuligan sang mag-utod nga ihaboy sa floodway ang lawas sang biktima.
