Padayon sa gihapon nga nagapanawagan sang hustisya ang pamilya ang pamilya sang biktima nga ginluthang patay sa Miagao, Iloilo sang Mayo 31.
Ang biktima amo si alyas Alvin, 26 anyos samtang ang suspek naman amo si alyas Apa, 44 anyos, kasado kag lunsay mga residente sang nasambit nga barangay.
Ini matapos ang gina-alegar nga naka-guwa ang suspek bangud na-delay ang pagpasaka sang kaso sang Iloilo Provincial Prosecutor’s Office.
Suno sa pamilya sang biktima, ulihi na nila nahibaluan nga ang ila ginsaligan nga abogado indi lisensyado kag paryente pa sang suspek.
Bangud sini, nagkuha sang bag-o nga abogado ang pamilya sang biktima agud mapadayon ang pag-asikaso sang mga kinahanglanon nga dokumento.
Suno sa impormasyon nga ila nabaton, nalagpsan sini sang 35 minutos nga reglementary period para sa pagdetinar sang suspek, nga nangin kabangdanan sang iya pag-release.
Nahibaluan nga ang napatay nga alyas Alvin ang ikawalo sa napulo ka mag-ulutod kag nagapanawagan gid ang iya pamilya nga makabaton sang hustisya para sa himata.
Nagalaum man ang mga ini nga mangin patas ang imbestigasyon sang kaso kag nga mapasabat ang suspek.
Sa interview sang Bombo Radyo kay Police Major Richard Lao, hepe sang Miagao Municipal Police Station, iya ginpahayag nga ang paglapas sang 35 minutos sa reglementary period kag ang kalayuon sang biyahe halin Miagao pakadto sa Iloilo City ang nangin rason sang pagpa-release sang suspek.
Apang ginpasiguro naman sang opisyal nga napasaka na ang kaso nga murder kag ginahulat na lamang ang nagakaigo kag legal nga proseso.
Samtang naga padayon ang kaso, ginpahayag ni Police Major Lao nga nagalikaw anay ang suspek para man sa iya kaugalingon nga seguridad.
Ginpasiguro man sang kapulisan nga nagabantay sila agud malikawan ang komprontasyon sa tunga sang suspek kag sang pamilya sang biktima.
