Ginpahibalo sang Tourism Office sang Miag-ao, Iloilo ang pagpatuman sang precautionary safety measures sa maragtason nga Miagao Church kasunod sang serye sang mga linog nga nagtay-og sa Antique kag nabatyagan man pati sa amo nga banwa sang Domingo sang gab-i, Hunyo 14.
Wala gindetalye sa post sang Tourism Office kun ano ka daku nga halit ang natuga sang mga pagtay-og sa Santo Tomás de Villanueva Parish Church apang ginkumpirma nga ginahulat pa ang dugang nga assessment sang heritage kag structural experts.
Sa subong suno sa talatapan, temporaryo nga ginadumilian ang access sang publiko sa facade sang simbahan.
Kinahanglan man ang protective measures suno sa opisina bangud sang posible nga peligro sang aftershocks kag mabaskog nga hangin ukon ulan.
Magluwas diri, kinahanglan man ang ma-id-id nga interior safety inspection nga may koordinasyon sa local building officials para malantaw ang structural safety sang simbahan.
Bwas, Hunyo 17, natalana nga magpatigayon sang post-earthquake inspection ang mga tiglawas sang National Commission for Culture and the Arts (NCCA) kag National Historical Commission of the Philippines (NHCP).
“We respectfully request the public’s cooperation and understanding as these precautionary measures are undertaken to ensure everyone’s safety and to help preserve one of Miagao’s most treasured cultural and historical landmarks,” suno sa Tourism Office.
Ang Miagao Church amo ang isahanon nga United Nations Educational, Scientific, and Cultural Organization (UNESCO) World Heritage site sa Visayas. Gintukod ini nga simbahan sang 1700s kag isa sa apat ka Baroque Churches sa Pilipinas nga ginakabig nga UNESCO World Heritage sites — upod sa San Agustin Church sa Manila, Santa Maria Church sa Ilocos Sur, kag Paoay Church sa Ilocos Norte.
Nahibaluan nga asud-asud nga pagtay-og nga may sentro sa Anini-y, Antique ang nabatyagan sang Domingo sang gab-i tubtub sang Lunes sang kaagahon. Ang pinakamabaskog amo ang natabo sang 11:34 p.m. nga una gin-rekord sang Phivolcs nga magnitude 4.7 antes ginpasaka sa magnitude 4.9.#
(Photo: Tourism Miagao)
