Wala nakuha sang Portugal ang kadalag-an matapos maka-score ang DR Congo kag nagtapos sa 1-1 nga draw ang ila pag-atubangay sa Group K sang 2026 FIFA World Cup.
Nagpanguna ang Portugal sa ika-6 ka minuto sang masulod ni João Neves ang header halin sa ginahamtangan ni Pedro Neto pakadto sa goal kun sa diin naghatag ini sang una nga puntos para sa Portugal.
Apang wala nagpapierde ang DR Congo kag padayon nga nagpangita sang paagi agud nga makabawi.
Antes matapos ang first half, nakahimo sang equalizer si Yoane Wissa pinaagi sa isa ka mabaskog nga header nga nagpabaskog sa kampo sang DR Congo kag nagpatas ang score sa 1-1.
Sa second quarter, mas nagpakita sang kumpiyansa ang DR Congo kag nangin mas madamo ang ila pagdumala sang bola.
Samtang ang Portugal naman nabudlayan na sa paghimo sang klaro nga mga opensa kag tsansa nga maka-score.
Sa ika-55 ka minuto, naglaom ang Portugal nga mabalik sa ila ang pagpanguna sang nakasulod sa goal ang matahum nga overhead kick ni João Cancelo.
Apang wala ini ginkilala sang mga opisyal bangud sa offside nga pagposisyon antes pa ini maka-score.
Nakita man ang kapaslawan ni Cristiano Ronaldo sa bug-os nga second quarter.
Ang 41-anyos nga captain sang Portugal nabudlayan sa pagkuha sang mga kahigayunan sa pag-score kag kaangay nga wala ini nalipay sa dalagan sang second quarter para sa iya team.
Sa pagsugod sang second half, ginsulod sang Portugal si Francisco Conceição bilang kabaylo ni Bernardo Silva agud mapabaskog ang ila opensa.
Apisar nga ginpasulod pa ini, nagpadayon nga nangin mabaskog ang DR Congo ilabi na sa ila madasig nga pagkontra kag pag-atake nga ginapangunahan ni Wissa.
Sa pagtapos sang second quarter, nagpabilin nga patas ang score kun sa diin nangin 1-1 ang duha ka team.
