Magapatuman sang adjustment ukon pagdugang sang sukot sa kuryente ang MORE Electric and Power Corporation sa bulan sang Hunyo.
Sa interview sang Bombo Radyo kay Angel Tan, Spokesperson sang MORE Power Corporation, iya ginpahayag nga magadugang sang P2. 04 per kilowatt per hour ang saka para sa konsumidor.
Ini nga pagsaka sang balayran sa kuryente bangud sa pagtaas ukon pagdoble sang presyo sang kuryente halin sa planta.
Ginalantaw man nga rason sang MORE amo ang transmission constraints ukon limitasyon sa pag-agi sang kuryente sa grid nga nagaka-apekto sa supply distribution.
Suno pa kay Tan, ini nga pagtaas ang bangud man sang mas mahal nga presyo sang kuryente sa merkado, partikular sa Electricity Spot Market nga amo ang nagapabug-at sang gasto sa suplay sang kuryente.
Ginklaro man sang kompanya nga ini nga sitwasyon gin-forecast na nila antes pa ang bulan sang Hunyo, kag ginpahanumdom nga ini nga mga external factors indi kontrolado sang distribution utility.
Nagpahanumdom ang MORE Power sa mga konsumidor nga mag-tipid sa paggamit sang kuryente agud mabuligan nga mabuhinan ang demand kag makabulig man sa pagbalanse sang load sang grid.
Dugang pa ni Tan, importante nga mangin responsable ang mga konsumidor para sa energy conservation sa panimalay kag mga nagkalain-lain nga establisyemento.
