Ginpa-Bombo sang isa ka concerned citizen ang driver kag konduktor sang isa ka Mohon-route modernized jeep matapos nga ginpahayag nga wala sila ginpapanaog sa ila insakto nga destinasyon sa Iznart area.
Sa interview sang Bombo Radyo sa complainant nga si Alyas Miguel, iya ginpahayag nga sa pagsaka pa lang nila nagpahibalo na ini sa konduktor nga sa Iznart sila manaog.
Apang sang naka-abot na sila sa downtown area, gilayon sila nga ginpapanaog sa bahin sang Rizal Street.
Suno pa sa pasahero nga ulihi na lang sini natalupangdan nga lain ang ginbayaran sini nga lugar nga ila papanaugan kuntani kag lain man ang nakabutang sa ila ticket.
Pahayag pa sini, apisar nga mabudlay para sa ila nga magpanaog kag maglakat, napilitan sila nga manaog upod ang senior citizen sini nga iloy.
Sang amo man nga tion tuman pa ka init ang tyempo kag naglain pa ang pamatyag sang iya iloy bangud man sa paglakat.
Sang ginpapalab-ot sang Bombo Radyo Iloilo ang ini nga problema sa chairman sang Western Visayas Transport Cooperative nga si Mr. Raymundo Parcon, iya ginpahayag nga pagaimbestigaran nila ang insidente kag pagapinahan ang konduktor.
Pahayag pa ni Parcon, dapat nga mangin maintindihon ang mga konduktor kag dapat magbulig ukon mag-assist sila sa ila nga mga pasareho kag indi mangin malain ang batasan bangud nagatrabaho sila sa publiko.
Nagpasiguro man si Parcon nga ila pagahimuon ang ila obligasyon agud indi na maliwat ang kaangay nga insidente.
