Ginkuha na sang pulis agud ipaidalom sa forensic examination ang isa ka bagul sang tawo nga nakit-an sa suba nga sakop sang Zone 2, Barangay Agutayan, Sta. Barbara, Iloilo.
Pasado alas syete kaina sang aga sang nakit-an ini sang isa ka pangayaw nga nagapangkutkot sang balas sa suba.
Sa interview sang Bombo Radyo kay Punong Barangay Fe Sumalde, iya ginpahayag nga sang gin-usisa ang palibot sang suba, wala na sang iban pa nga parte sang lawas nga nakit-an.
Suno sa opisyal, padayon pa nga ginahibalo kun sa diin naghalin ang bagul kag kun ano ang mga sirkumstansya kun ngaa nakalab-ot ini sa amo nga lugar.
Ginkumpirma sini nga may mga residente halin sa Barangay Cabugao Norte, Sta. Barbara nga nagkadto sa Barangay Agutayan kasunod sang pagkasapo sa bagol.
Suno sa ila, posible nga iya ini sang ila utod nga babaye apang wala pa ini napamatud-an samtang wala pa sang pormal nga pagkilala ukon siyentipiko nga eksaminasyon nga ginahimo sang mga otoridad.
Ginpahayag man ni Sumalde nga may nauna na nga kaso sang isa ka babaye nga nadula man sa ila barangay sang naglaslas ang Bagyo Frank sang tuig 2008. Apang iya ginpabutyag nga wala pa sang bisan ano nga ebidensya nga nagapakita nga may koneksyon ang amo nga insidente sa bagul nga nasapwan sa suba.
Nagaplano naman ang barangay nga makig-angot sa simbahan agud mahatagan sang nagakaigo nga pagrespeto kag paglubong ang amo nga bagul.#
(Report: Bombo Cyrene Nasis)
