Nakasulod na sa Round of 32 sang FIFA World Cup 2026 ang host nation nga Estados Unidos.
Ini matapos mapierde sini ang Australia national team sa score nga 2-nil.
Apisar wala ang star player sang United States men’s national soccer team nga si Christian Pulisic bangud sa injury, nagpakita sa gihapon sang mabaskog nga depensa ang US squad kag nakuha sini ang kadalag-an.
Sa amo nga hampang nag-panguna ang Estados Unidos sa scoreboard.
Antes matapos ang first half, nagdugang pa sang isa ka goal ang USA nga ginpasulod ni Alex Freeman.
Una ini nga gin-disallow bangud sa offside, apang matapos ang VAR review, gin-kumpirma nga sulod ang goal.
May possibilidad nga magpanguna sa Group D winners ang Estados Unidos kon mapierde sang Turkey national football team ang Paraguay national football team sa ila masunod nga hampang.
Ginapanan-aw sang Ilonggo football icon kag Azkals legend nga si Chieffy Caligdong nga makalab-ot sa semifinals sang FIFA World Cup 2026 ang defending champion nga Argentina kag ang powerhouse teams nga Spain, France, kag Brazil.
Suno kay Caligdong, napili sini ang apat ka nasambit nga teams indi bangud may yara sila sang star players kundi bangud sang istilo sang ila paghampang kag ikasarang sang ila individual players.
Ginkonsiderar man sini kun paano ini nga mga pungsod nag-umpisa sa qualification tubtub sa ila nga pagtapak sa World Cup.
Pahayag pa ni Caligdong, posible man nga makuha sang Argentina ang back-to-back championship.
Suno kay Caligdong, ginahingalitan gid sang Argentine team nga yara pa si Lionel Messi nga makabig gihapon nga delikado nga player kun yara ini sa attacking third apisar nga naga-edad na ini sang 39-anyos.
Nahibaluan nga ang katapusan nga pungsod nga nakakuha sang back-to-back title sa men’s FIFA World Cup amo ang Brazil nga nagdaog sang 1958 kag sang 1962.
