Nagalawig na sang duha tubtub tatlo ka tuig ang daan nga hiligut-anon sa tunga sang suspek kag biktima sa nagluntad nga shooting incident sa Barangay Airport, Mandurriao, Iloilo City.
Ang arestado amo ang 50-anyos nga lalaki nga naga-trabaho bilang construction worker samtang ang biktima naman amo ang 57-anyos nga electrician.
Suno kay Police Captain Lester Oliveros, hepe sang Iloilo City Police Station (ICPS) 10, iya ginpahayag nga kagab-i, nakit-an na lang sang asawa sang biktima nga nagapukotay na ang duha kag sang ulihi, nagtindog ang suspek kag gintiro ang biktima nga nangin rason sang kamatayon sini.
Indi pa maathag kun sin-o ang nagapanag-iya sang armas.
Base naman sa barangay officials, nagasuprer ang suspek sang nervous breakdown.
Ginapahayag nga nagtuyo man ini sang una nga manglabo sa biktima, kag bangud sa amo nga insidente, ginpapalayo anay ini sa Mandurriao kag gindala sa Mindoro.
11:00 sang gab-i sang natabo ang amo nga shooting incident kagab-i. Halin sadto, gintinguhaan pa sang pulis nga makig-negosyar sa suspek apang nagapamalibad ini sa pagsungka.
Base sa pulis, madamo lang sang ginawakal ang suspek kag ang katapusan sini nga ginhambal amo nga alas syete siya sa aga masungka bangud nga matulog pa ini.
Ginhulat pa sang mga pulis nga mag-aga bangud nga tuman ka dulom ang area kag armado pa ang suspek.
Sang ginsulod na sang SWAT ang balay sang nagsanaaw na ang palibot, makapila ka beses pa nga nabatian ang pagpalupok sang suspek tubtub nga nagbalos man palupok ang SWAT kag napilasan ang lalaki.
Gindala ini sa ospital agud nga mabulong ang iya nga samad. Indi pa matumod kun pila ang iya pilas kag kun diin nga parte sang lawas.
Nag-check naman ang SOCO sa crime scene.
