Natukiban sang General Services Office (GSO) nga mas madamo pa gid kuntani ang mga expired commodities kag plastic bottles nga iga-dispose sang isa ka bottling company sa Jaro River.
Sa interview sang Bombo Radyo kay Engr. Neil Ravena, head sang GSO, iya ginpahayag nga napadala na nila ang reklamo sa natungdan kag ila pasabton ang amo nga kompanya.
Ginpahayag ni Ravena nga iya na ginrekomendar sa Iloilo City Legal Office ang pagpasaka sang kaso batok sa bottling company tungod sa paglapas sini sa Solid Waste Management Act kag Clean Water Act.
Ginapreparahan naman sang GSO ang case build-up kag pagtipon sang mga ebidensya agud masuportahan ang pagpasaka sang kaso.
Nagapangabay naman ang opisina sang kooperasyon sa publiko sa pagtipig sang palibot kag sa pagreport sang mga iligal nga aktibidad nga nagaresulta sang malain nga balik sa mga kasubaan sang syudad.
Dugang pa ni Ravena, dapat mangin responsable ang kada indibidwal kag kompanya sa pagdumala sang ila mga basura agud malikawan ang paglapta sang polusyon kag indi na madugangan ang problema sa Jaro River.
Nagpaandam man ang GSO nga may napreparar na sila nga nagakaigo nga penalidad para sa mga tawo nga mapamatud-an nga naglapas sa mga layi.
