Naka-record sang sunod-sunod nga kamatayon sang mga baboy ang banwa sang Dumangas, Iloilo subong nga bulan sang Hunyo.
Sa interview sang Bombo Radyo kay Eugenio Decastillo Jr., Municipal Agriculturist sang Dumangas, iya ginpahayag nga wala pa nila matumod kon ano ang ginhalinan sang amo nga insidente kun may kaangtanan bala ini sa African Swine Fever (ASF).
Suno pa kay Decastillo, ginakadtuan na sang mga livestock technician ang lugar nga may nagkalamatay nga baboy agud usisa-on ini.
Ginpahayag pa ni Decastillo nga wala sang nakita nga biskan ano nga sintomas nga nagapakita nga maanggid ini sa kaso sang ASF bangud wala sang pantal-pantal ukon hilanat ang mga baboy antes ini napatay.
Sa baylo, gulpi lamang nga nagluya ang mga ini kag nagkalamatay.
Suno sa tag-iya sang mga baboy, posible nga virus ang ginhalinan sang ila kamatayon.
Dugang pa ni Decastillo, nagsulat na ang Municipal Agriculture Office sa Provincial Veterinary Office agud maimbestigaran ang amo nga insidente.
