Ginahanda na sang kapulisan ang kaso nga murder kag paglapas sa firearms law ang ipasaka batok sa suspek nga nagluthang patay sa iya kasilingan sa Barangay Airport, Mandurriao, Iloilo City.
Sa interview sang Bombo Radyo Iloilo kay Police Captain Lester Oliveros, hepe sang Iloilo City Police Station 10, ginpahayag sini nga padayon ang pag-asikaso sang mga kinahanglanon nga dokumento agud mapasaka ang mga kaso batok sa suspetsado.
Nahibaluan nga nasamaran ang suspek matapos magbato ini sa Special Weapons and Tactics ukon SWAT Team sang ginsulod ang iya balay sa tunga sang negosasyon.
Nakaagom ini sang pilas sa tuo sini nga butkon, pilas sa tiil kag amo man sa iya nga dughan.
Gilayon naman ini nga gindala sa Western Visayas Medical Center agud mabulong Samtang, ang biktima naman nga ginluthang sini ang ginbawian gid sang kabuhi.
Nahibaluan nga nagasuprer sang nervous breakdown ang suspek kag sang amo nga tion gina-alegar nga wala ini sang maayo nga tinulugan kag wala ini naka-inom sang iya maintenance nga bulong.
