Ginakabig nga isa ka accidental firing kag wala sang foul play sa kamatayon sang isa PNP Special Action Force (SAF) Member sa Barangay Pili, Ajuy sang nagligad nga Hunyo 16, 2026 suno sa Ajuy Municipal Police Station (MPS).
Suno kay PCapt. Aileen Lacrite, hepe sang Ajuy MPS, iya ginpahayag nga base sa ginpatigayon nga paraffin test sa asawa sang PNP SAF member nangin negatibo ang resulta sang test.
Pahayag pa sini, base sa resulta sang autopsy, nakaangkon ini sang isa ka igo sang bala sa tuo nga bahin sang iya lawas nga posible napitik sini ang iya nga issued firearms samtang nagakatulog.
Ginpahayag man ni PCapt. Lacrite nga base sa imbestigasyon, nakitaan sang igo ang habol sang biktima nga ginagamit sini antes naglusot sa iya nga lawas.
Dugang man sini nga wala man sang indikasyon nga nag-away ang mag-asawa antes natabo ang insidente.
Sa pihak nga bahin, ginpahayag ni PCapt Jan Paul Magmuyao, Company Commander sang 63rd Special Action Company, nga ila na sa subong ginaproseso ang mga benefits nga mabaton sang pamilya.
Madumduman nga ang SAF member ang may ranggo nga Patrolman, 33-anyos kag naka-assigned sa probinsya sang Antique.
Ginpahayag man ni PCapt. Magmuyao nga sang natabo ang aksidente, naka-anniversary pass ang pulis rason nga nakapauli ini sa ila balay sa banwa sang Ajuy.
Bangud sa insidente, hugot nga ginapahanumdum sini sa mga kapulisan nga siguraduhon ang gun safety sang ila mga issued firearm ilabi na kun yara sa ila mga puluy-an agud malikawan ang kaangay nga insidente.
