Preparado na ang Philippine Coast Guard Iloilo para sa saulugon nga pista ni San Juan Bautista bwas nga adlaw, Hunyo 24, kun sa diin madamo ang mga nagapadulong sa mga baybayun agud nga magpaligo.
Sa interview sang Bombo Radyo kay Ens. El John Ga, Spokesperson sang PCG-Iloilo, iya ginpahayag nga 200 ka mga personnel kag floating assets ang iga-deploy sa probinsya kag siudad agud masekyar ang seguridad sang publiko sa nasambit nga selebrasyon.
Suno sa iya, nagakoordinar man ang ahensya sa mga Local Government Units kag Disaster Risk and Reduction Management Offices agud nga mas mangin organisado ang mga response operations.
Ginpatpat man ni Ga ang mga importante nga mga dapat panumdumon sang mga beachgoers bwas nga adlaw:
Una, hibaluon gid anay ang lakat sang panahon kag ang sitwasyon sang dagat nga inyo pagakadtuan.
Ikaduha, siguraduhon nga may ara sang naka-duty nga lifeguard kag may ara man sang life saving equipments sa isa ka beach.
Ikatlo, likawan nga maglangoy nga isahanon agud malikawan ang disgrasya, ilabi na sa mga kabataan kag tigulang.
Ika-apat, sundon ang mga safety signages nga nahamtang sa beach resorts.
kag Ikalima, dapat gid nga nakahibalo sang mga emergency contact numbers.
Nahibaluan nga ang pista ni San Juan ang ginaselebrar kada-tuig agud nga dumdumon ang pagkatawo sang Santo nga si San Juan Bautista nga nagbunyag kay Hesukristo sa Suba sang Jordan.
