Masobra sa 50% gid sang kita sang mga sugarcane farmers sa Barotac Nuevo, Iloilo ang nadula bangud sa pag-atake sang Red Stripe Soft-Scale Insect (RSSI) sa mga katubuhan.
Sa interview sang Bombo Radyo isa ka sugarcane farmer nga si alyas Jonathan sa Tabucan, Barotac Nuevo, iya ginpahayag nga kun sadto, yara pa sa 80 tubtob 90 ka tonelada ang patubas kada ektarya, apang bangud sa peste, nagnubo ini sa 40 ka tonelada.
Suno sa iya, may gina-spray sila nga bulong apang kinahanglan nga sulit-suliton ini kada 15 ka adlaw nga tuman naman ka gasto para sa ila kag indi man sini mapapas gid ang tanan nga peste.
Nahibaluan nga magluwas sa Barotac Nuevo, apektado man ang iban nga banwa sa 4th district kalakip ang San Enrique, Duenas, kag mangin ang Passi City.
Base sa inisyal nga data, naglab-ot na sa masobra 5,000 ektarya sang katubuhan sa Visayas ang nahalitan sang Red Stripe Soft-Scale Insect.
Yara naman sa 200 ektarya sang katubuhan ang apektado sa Iloilo.
Nahibaluan nga ginaguba sang Red Stripe Soft-Scale Insect ang mga tubo paagi sa pagsuyop sang duga sang dahoon nga nagaresulta sa indi maayo nga pagtubo ukon pagkapatay sang mga tubo.
