Gin-athag ni Senate Minority Leader Alan Peter Cayetano nga indi dapat mangin balabag ang impeachment trial ni Vice President Sara Duterte sa padayon nga imbestigasyon sang Senado may kaangtanan sa sa anomaliya sa mga proyekto sang flood control.
Sa isa ka vlog sang Senador, nagpaandam ini sa posibilidad nga matabunan sang impeachment proceedings ang mga imbestigasyon sa korapsyon.
Suno sa iya, mas dako ang kantidad nga ginausisa sa kontrobersiyal nga flood control projects kag kinahanglan nga ipadayon ang mga hearing sang Senate Blue Ribbon Committee.
Gin-agda man sini ang Senado nga liwat nga magpatigayon sang mga hearing kag hatagan sang kahigayunan ang administrasyon kag oposisyon nga makapresentar sang ila mga testigo.
Ginpakamala-ot naman ni Cayetano ang mga pahayag ni anay Blue Ribbon Committee chair Panfilo Lacson kag ang bag-o nga chairman nga si Senador Erwin Tulfo may kaangtanan sa isyu.
Ginpanginwala ni Senator Francis Escudero ang alegasyon nga nakabaton ini sang maleta nga puno sang kuwarta nga gina-angot sa anay kongresista nga si Zaldy Co.
Suno kay Escudero, wala ini sang kamatuoran kag indi dapat maimpluwensyahan sang pulitika ang mga imbestigasyon sa korapsyon.
Sa separado naman nga pahayag, nagsiling si Senador Imee Marcos nga naga-atubang sang dako nga pressure kag mga kaso sanday Escudero kag Senador Joel Villanueva.
Naglaom man siya nga makita sa masunod nga mga bulan ang panindugan sang mga senador sa impeachment, national budget kag mga imbestigasyon sang Blue Ribbon Committee.
Dugang pa ni Cayetano, nga dapat ang iya mga kaupdanan sa Senado magpabilin nga patas samtang ginadumalahan ang impeachment trial, suno sa mga patakaran sang Senado.
