Nagsaka na sa 188 ang napatay kag masobra sa 1,500 ang napilasan kasunod sang magkasunod magnitude 7.2 kag magnitude 7.5 nga linog nga nagtay-og sa Venezuela.
Suno sa United Nations, masobra sa 100 ka mga building ang nag-collapse sa amo nga lugar kag sa port city sang La Guaira kadungan sang linog.
Ginakahangaw-an nga magasaka pa ang numero ilabi na nga padayon pa ang search and rescue sa kapital nga Caracas.
Nag-abot naman sa Venezuela ang elite rescue teams halin sa Estados Unidos sang Amerika kag ang ayuda halin sa UN, Latin American nga mga pungsod, Vatican kag iban pa.
Sa bahin sang Vatican, nagpadala si Pope Leo sang $113,700 nga bulig. Gin-pain ini sang Santo Papa matapos ang konsultasyon sa Apostolic Nuncio sa Venezuela nga si Monsignor Alberto Ortega Martín kag sa Archbishop of Caracas nga si Monsignor Raul Biord Castillo.
Nagpromisa naman ang US nga magahatag sang $150 million kun sa diin $100 million ang contribution sa UN humanitarian fund para sa Venezuela kag $50 million sa mga organisasyon nga nagatrabaho na sa amo nga pungsod.
Magapadala man ang US Defense Department sang aircraft agud nga ma-assess ang halit, makit-an ang iban pa nga nasamaran, kag makahatag sang assistance sa mga nakaluwas.
Sa interview sang Bombo Radyo Philippines kay Consul Judy Razon sa Philippine Embassy sa Colombia nga may hurisdiksyon sa Venezuela, iya ginpahayag nga padayon ang ila koordinasyon sa mga Pilipino sa amo nga pungsod.
Sa inisyal nga impormasyon kag reports, wala sang mga Pinoy nga nasamaran apang may mga nagakomento na sa page sang embahada kun sa diin sila mahimo makapalapit para sa bulig.
Suno kay Razon, napaidalom na subong ang pungsod sa state of emergency, ginsirado man ang airport bangud sa daku nga damage, kag suspendido man ang klase kag ang nonessential activities.
Nagpanawagan naman ang embahada nga magpakig-angot sa ila ang mga pamilya sa Pilipinas nga may mga himata sa Venezuela agud nga ma-check ang ila nga kondisyon.#
