Nagguwa na ang resulta sang ballistic report kag autopsy sang tatlo ka estudyante nga napatay sa pagpangluthang sa San Jose National High School sa Tacloban City.
Suno sa Philippine National Police (PNP) Regional Forensics Unit 8, ang tatlo ka biktima natiruhan sang bala halin sa malayo nga anggulo nga nagapakita nga ang pagpangluthang wala sang partikular nga ginpuntiriya kundi random shooting.
Base sa imbestigasyon, ang mga bala nagtandog sa importante nga mga parte sang lawas sang mga biktima nga amo ang nagresulta sa ila gilayon nga kamatayon.
Ginahanda na subong sang mga awtoridad ang pinal nga forensic report agud isumiter sa mga imbestigador.
Sa pihak nga bahin, nagsiling ang PNP nga magapasaka sila sang kaso batok sa pulis nga tiya sang 14-anyos nga suspek nga si alias Nash bangud sang iya pagpabaya nga magamit sang menor de edad ang iya service firearm. Kasuhan ini sang paglapas sa Article 365 sang Revised Penal Code ukon negligence.
Suno pa sa PNP, posible man nga maatubang sa pareho nga kaso ang lolo sang suspetsado nga ginasiling tag-iya sang kalibre .38 nga armas nga gingamit sa insidente.
Nauna na nagguwa sa imbestigasyon sang PNP nga ang 14-anyos nga suspek ang nakapalupok sang 33 beses kag nag-reload pa sang iya dala nga pusil.
Isa naman ang ginapahayag nga napalupok sang 15-anyos nga si alias Rod.
Samtang, nag-agi na sa psychological first aid ang pila ka mga maestro, maestra, kag personnel sang eskwelahan agud buligan sila nga makabangon halin sa natabo nga trahedya.
Suno sa principal sang San Jose National High School, may yara na sang nakasugtan nga mga safety protocol ang eskwelahan kon may matabo liwat nga amo sini nga insidente.
Kabahin sini ang gilayon nga pagsira kag pagkandado sang mga puwerta sang classroom agud maprotektaran ang mga estudyante.#
