Ginmandu sang trial chamber sang International Criminal Court (ICC) nga i-freeze ang kwarta nga dala ni former president Rodrigo Duterte sang gindakop siya sadtong 2025.
Suno sa defense lawyer nga si Peter Haynes, ginsunod sang chamber ang request sang prosekusyon nga i-freeze ang amo nga kwarta kag nagmandu man sa Registry nga maghatag sang inventory sang items nga nakuha kay Duterte sang amo nga tion.
Wala ginsapubliko kun pila ang kwarta ni Duterte sang gin-aresto siya sa Ninoy Aquino International Airport (NAIA) sang Marso 2025 kag gindala sa ICC detention facility sa The Hague, Netherlands.
Sandig naman sa ICC Registry, nagapabilin ang cash sa kustodiya sang chief custody officer sang detention center.
Naghingyo man ang prosecution sa korte nga hatagan sila sang access sa pila ka items nga nakumpiskar kay Duterte sang gindakop ini lakip na ang pila ka mga yabi.
Ginklaro naman sang team ni Duterte nga wala nila ginapamatukan ang request sang prosecution, apang ginplastar nila nga nga wala sang bastante nga rason ang pag-request sang access sa mga yabi.
Gintawag ni Haynes ang request sang prosecution nga isa ka “fishing expedition” bangud wala sang basehan nga i-angot ang mga yabi sang ginaalegar nga ginhimo nga krimen.
“The request is, in substance, a fishing expedition,” suno kay Haynes. “Prosecution advances no evidential basis connecting the keys either to the commission or furtherance of the alleged crimes or to any assets that may be relevant to the investigation,” dugang sini.
Matandaan nga nagapangatubang si Duterte sang three counts sang crimes against humanity bangud sa iya kontrobersyal nga drug war.
Napasaka na ang kaso sa full-blown trial nga natalana nga magsugod sa Nobyembre 30, 2026.#
