Gin-athag sang Provincial Veterinary Office nga kontrolado na nila ang kumpirmado nga kaso sang African Swine Fever ukon ASF sa banwa sang Barotac Viejo, Iloilo.
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga lima ka baboy ang nagpositibo sa ASF kag gilayon nga ginpatuman ang nagakaigo nga protocol agud mapunggan ang paglapta sang nasambit nga sakit.
Ginpaidalom man sa laboratory testing ang mga baboy kag nakumpirma nga positibo ini sa ASF.
Pahayag pa sini nga gilayon nga gin-dispose sa husto nga pamaagi ang mga baboy nga may ASF.
Dugang pa niya, wala man nagpabaya ang tag-iya sang baboy bangud nagkooperar ini sa otoridad agud indi na maglapta pa ang virus.
Nagpatigayon naman sang disinfection sa nasambit nga lugar.
Nagapanawagan si Tabuada sa mga hog raisers nga magsunod gid sa biosecurity measures kag ireport gilayon sa ila opisina kon may nagamasakit ukon nagakalamatay nga baboy sa ila mga uma.
Suno pa sa opisyal nga importante ang kooperasyon sang mga tag-iya sang baboy agud mapabilin nga kontrolado ang sitwasyon kag maprotektahan ang industriya sang baboy sa probinsya.
