Pagasiguraduhon sang Iloilo City Police Office (ICPO) nga ipaidalum sa maid-id nga imbestigasyon ang natabo nga pagpangsulod kag pangpataya sang armas luthang sang katapo sang Integrity Monitoring Enforcement Group (IMEG) sa police personnel sang Iloilo City Police Station (ICPS) 4 kag sa pila ka mga sibilyan.
Sa interview sang Bombo Radyo kay ICPO Director PCol Wilbert Parilla, iya ginpahayag nga sunod man sa mandu ni PRO 6 Acting Regional Director PBGen Randulf Tuaño, kinahanglan reviewhon gid ang chronological order sang nasambit nga insidente agud mahibaluan kun may yara sang lapses ukon kapaltahan sa pagpatuman sag operational procedures.
Suno kay PCol Parilla, handa nga i-assist sang ICPO ang mga civilian nga mag-file sang complaint batok sa katapo sang IMEG matapos nga naghatag sa ila sang kakulba kag kahangawa.
Pahayag pa niya nga may yara na sang duha ka sibilyan ang nag-complaint kag ini ang ginhatag naman sang assistance sang ICPO.
Ginpahayag ni PCol. Parilla nga ang indibidwal nga ginapangita sang IMEG ang isa anay ka pulis nga na-assigned sa PRO 6 apang gin-dismiss matapos nga may kaso ini sang murder.
Magaserbe kuntani ang IMEG sang warrant of arrest batok sa ex-police apang nangin negatibo ang operasyon kag wala nadakpan ang subject.
Nagapangayo man sang pasaylo si PCol Parilla sa publiko sa natabo ilabi na sa mga sibilyan nga naulamid.
Dugang pa niya, pagasiguradohon sang kapulisan nga magaagi sa legal kag intsakto ang proseso sang imbestigasyon.
Sa subong, ginpahayag sini nga nagapabilin nga bukas ang talatapan sang ICPS 4 sa publiko kag ginpasiguro nga wala sang makapahog sang operasyon ukon duty sang mga kapulisan bangud sa nasambit nga hitabo.
