Nag-abante na sa third round sang 2026 Wimbledon Championships ang Filipina tennis star nga si Alex Eala matapos nakabawi kag ginlutos sa second round si Maya Joint sang Australia, 3-6, 6-2, 6-0.
Balos ini sang 21-anyos nga si Eala sa 20-anyos nga si Joint matapos ginlutos siya sini sa final game sa Eastbourne Open sang nagligad lang nga tuig.
Rank 32 si Eala sa latest ranking sang WTA kag No. 29 seed sa amo nga tournament, samtang unseeded naman ang Australian player nga subong nagauyat sang pwesto bilang world no. 49.
Kasunod sang kadalag-an, mas mabug-at nga hangkat ang atubangon ni Eala sa masunod nga round nga amo ang Wimbledon women’s singles defending champion nga si Iga Swiatek sang Poland.
Ini na ang ila mangin ikatatlo nga pagkitaay.
Matandaan nga gin-upset ni Eala si Swiatek sa quarterfinal match sang Miami Open sang nagligad nga tuig apang nakabalos ang Polish netter sa Last 64 sang Madrid Open sang nagligad lang nga Mayo.
Sa kadalag-an batok kay Joint, nakahimo na si Eala sang maragtas bilang kaupod na subong sang Filipino tennis legends nga sanday Felicismo Ampon kag Raymundo Deyro nga nakalab-ot sa third round sang Wimbledon.#
