Nagpanawagan ang Office of the Provincial Veterinarian sa mga nagasagod sang baboy nga istriktuhon gid ang pagpatuman sang biosecurity measures agud malikawan ang kaso sang African Swine Fever (ASF).
Ini ang kasunod sang nakumpirma nga kaso sang ASF sa backyard farm sa Barotac Viejo nga amo ang una nga kaso sa probinsya subong nga tuig.
Sa interview sang Bombo Radyo kay Provincial Veterinarian Dr. Darel Tabuada, iya ginpahayag nga apisar ginapahanumdom sang opisina nga indi dapat mag-panic, dapat nga ipabilin man ang pagsunod sa Level 1 biosecurity measures nga amo ang pagbutang sang mga kudal kun sa diin indi makasulod ang mga manok kag ido.
Dapat man nga may ibutang nga footbaths.
Magluwas diri, ginapanugyan man nga limitahan ang pagsulod sang mga tawo sa mga babuyan.
Ginapahanumdom man nga likawan ang swill feeding ukon ang paghatag sa mga baboy sang mga damog ukon mga sobra nga pagkaon.
Nagpanawagan man ang opisina sa local government units, mangunguma, kag operators sang mga slaughterhouse nga siguruhon nga kumpleto ang documentary requirements kun magbyahe sang mga baboy.
Lakip sa rekisitos amo ang veterinary ukon animal health certificate, disinfection certificate para sa salakyan ukon transport vehicle, kag local transport permit.
Suno kay Tabuada, wala pa dalayon nga na-eliminate ang ASF sa probinsya, nga nagakahulugan nga nagapabilin gihapon ang pamahog.
Sa record sang opisina, may 28 positive cases ang Iloilo sang 2025 kun sa diin 26 ang na-detect sa border checkpoints kag duha sa stockyard sa Pavia.
