Ginkumpirma ni Palace Press Officer Undersecretary Claire Castro ang insidente sa Vancouver, Canada kun sa diin ginsundan siya kag gin-harass sang grupo sang mga Pinoy.
Suno kay Castro, naga-shoot lang sila sang reels nga parte sang ila trabaho kadungan sang state visit ni President Ferdinand “Bongbong” Marcos, Jr. sa amo nga pungsod.
Pahayag sini, may nagpalapit sa iya kag nagpamangkot kun siya si Castro, kag sang ginkumpirma niya ini, didto na kag nagsinggitan ang Pinoy nga dapat nga hambalon niya si Marcos nga mag-resign.
Wala ginhingadlan ni Castro kun ano nga klase sang grupo ang iya naatubang apang suno sa iya, ang naratibo sang naga-protesta nagahambal sang “magnanakaw”, “maleta”, kag “BBM, resign!”
Pahayag pa sini, ginhambalan siya nga malaw-ay.
“Sinabihan ako na pangit at sinungaling. Nung sinabi nilang pangit ako, feeling ko sila yung sinungaling,” suno kay Castro. Dugang sini, “may freedom of expression tayo pero hindi kailangan maging bastos.”
Bangud sa natabo suno sa Malacañang official, wala natapos ang ila pag-shoot sang reels.
Gin-ako man sini nga nakabatyag siya sang kahangawa bangud duha lang sila sang iya upod sang amo nga tion kag wala siya nakahibalo kun basi sakiton sila.
Sa separado nga video, makit-an nga may Pinay nga may dala pa nga megaphone kag nagasiling nga “kaluoy ang mga Pilipino” samtang may nagamensyonar man sang “Ante Claire” kag “kapal ng mukha!”
Nagpalapit man si Castro sa mga pulis agud magpangayo sang bulig.
“Siguro ‘yung grupo naman nila parang… kung sino man ‘yung iniidolo nila parang sanay sa bayolente. ‘Yung pagiging bayolente, so siyempre hindi namin alam,” suno pa sa Palace Press Officer.
Indi pa klaro kun natabo ang insidente antes ukon pagkatapos sang pagpakigkita ni Marcos sa Filipino community sa Vancouver. Sa amo nga event, makit-an nga present man si Castro.#
