Pilason ang isa ka babaye matapos ginlabo sang iya bana samtang bag-o pa lamang ini nakapauli halin sa iya obra sa kampo sa Barangay Jaguimitan, Passi City, alas-5:30 kahapon, Hulyo 4.
Sa interview sang Bombo Radyo kay Police Lieutenant Colonel Herman Magbanua III, Hepe sang Passi City Police Station, iya ginpahayag nga pag-abot sang biktima sa ila balay, naabtan niya ang iya bana nga naga-inom sang makahulubog nga ilimnon.
Nagsugod lamang ang tensyon sa tunga sang mga ini sang nagpamangkot ang suspek kun may problema bala ang iya nga pamilya sa iya kag sa wala ginalauman hinali lamang sini nga ginlabo ang biktima gamit ang binangon.
Suno kay Magbanua, wala sang nagluntad nga pagbinaisay sa tunga sang mag-asawa antes natabo ang insidente.
Nakaagom naman ang biktima sang pilas sa tuo nga abaga sini.
Gilayon naman nga nagpangayo sang bulig ang utod kag mga kabataan sang biktima sa ila barangay kapitan antes ini gindala sa ospital.
Gilayon naman nga gintahi ang naagom nga pilas sang biktima.
Sa subong yara na sa kustodiya sang Passi City Police Station ang suspek.
Pagapasakaan naman sang kaso nga paglapas sa Republic Act No. 9262 ukon ang Anti-Violence Against Women and their Children Act of 2004 ang suspek.
